Томас Тухел може да добие отказ доколку Баерн утре, во реваншот, не го исфрли Лацио во осминафиналето на Лигата на шампионите. Германскиот шампион беше поразен во Рим со 1:0. Баерн моментално заостанува десет бода зад лидерот Баер Леверкузен во Бундеслигата, а е елиминиран и од Купот на Германија. Тухел сигурно ќе го напушти клубот на крајот на сезоната, но тоа би можело да се случи пред време.

Во тој случај Баерн веднаш би донел нов тренер. Арне Слот (45) би дошол од Феенорд и би се обидел да влезе во борба со Баер. Слот го води Феенорд од 2021 година и има 88 победи, 28 нерешени и 23 порази во 139 натпревари.

Минатата сезона беше шампион на Холандија, а во 2022 година загуби во финалето на Конференциската лига од Рома.

„Баерн во моментов размислува за изненадувачка алтернатива, тоа е тренерот на Феенорд, кој е прогласен за најдобар тренер во Холандија во последните две години. Тој е поддржувач на високиот пресинг, исклучително брзите транзиции, неговите тимови играат атрактивен фудбал. Холанѓанецот може да биде најсериозен опција доколку пропаднат преговорите со Чаби Алонсо“, пишуваат Германците.