Вицепремиерот за економски прашања Фатмир Битиќи очекува до почетокот на април пратениците да го изгласаат законот за нефер трговски практики. Законот се очекува да оневозможи моќна компанија да влијае врз другите компании, ќе го уреди начинот на трговија на земјоделски и прехранбени продукти, ќе ги заштити производителите, а со неговата примена, според најавите од минатата година, се очекува и дополнително намалување на цените на производите.

„Собранието работи ефективно до почетокот на април и јас верувам дека пратениците на крај на мандатот ќе се одважат и секако ќе го донесат. Мислам дека тоа не е битно за ниедна влада, тоа е битно за нашите граѓани. Еве уште еден повик во наредните два месеци кога нема да има друг притисок затоа што Владата нема да носи нови закони, да ги поминат сите закони кои се останати во собраниска процедура подолго време“, рече Битиќи .

Законот, меѓудругото, предвидува намалување на рабатот со максимум десет проценти на годишно ниво што, според очекувањата на Владата, ќе ги намали цените на земјоделските и прехранбените производи и ќе влијае на подобрување на нивниот квалитет.