Скоро 10.000 смртни случаи од Ковид-19 се пријавени во декември, соопшти Светската здравствена организација (СЗО), предупредувајќи дека вирусот сè уште циркулира иако не е толку забележлив. Податоците од различни извори укажуваат на пораст на инфекциите во декември, поттикнати од собирите за време на божиќните празници и варијантата JN.1, која сега е најраспространета во светот, според СЗО.

„Иако Ковид-19 повеќе не е глобална здравствена закана, вирусот продолжува да се шири, модифицира и убива“, рече шефот на здравствената агенција на ОН, Тедрос Аданом Гебрејесус, на прес-конференција во Женева. Скоро 10.000 смртни случаи беа пријавени во СЗО минатиот месец, хоспитализирањата се зголемија за 42 отсто, а приемите на интензивна нега за 62 отсто во споредба со ноември.

Но, бројките се засноваат на податоци од помалку од 50 земји, главно во Европа и Америка, рече Тедрос. „Секако дека има зголемување во другите земји кои не го пријавуваат тоа“, нагласи тој. „Како што владите и поединците преземаат мерки против други болести, сите ние мора да продолжиме да преземаме акција против Ковид-19“, рече шефот на СЗО.

„Иако 10.000 смртни случаи месечно се далеку под врвот на пандемијата, овој број на смртни случаи што може да се спречат е неприфатлив“, додаде тој. Тедрос ги повика владите да ја задржат контролата врз вирусот и да обезбедат пристап до евтини и сигурни тестови, третмани и вакцини.

„Продолжуваме да ги повикуваме поединците да се вакцинираат, да се тестираат, да носат маски каде што е потребно и да се осигураме дека преполните внатрешни простори редовно се проветруваат“, рече тој. Тедрос прогласи крај на глобалната вонредна состојба предизвикана од Ковид-19 во мај 2023 година, повеќе од три години откако вирусот првпат беше откриен во Вухан, Кина кон крајот на 2019 година.