Американскиот Стејт департмент одобри уште една продажба на оружје на Израел, во вредност од неколку милиони долари, заобиколувајќи го Конгресот, пренесува ДПА.

Одбранбената агенција за безбедност и соработка во петокот соопшти дека државниот секретар Антони Блинкен утврдил дека „итноста на ситуацијата бара итна продажба на оружје на владата на Израел“, во вредност од околу 147,5 милиони долари, без потреба од вообичаен преглед на Конгресот.

Оваа одлука е „во национален интерес на САД“, додава агенцијата.

Блинкен на сличен начин го заобиколи Конгресот на 9 декември, кога побара „итна“ согласност за продажба на својот израелски сојузник 13.981 гранати од 120 милиметри за да ги опреми борбените тенкови Меркава вклучени во офанзивата на Газа против исламистичкиот Хамас. Вредноста на таа продажба била 106,5 милиони долари.

Конфликтот во Газа беше предизвикан од најтешкиот масакр во историјата на Израел. Тоа беше извршено од терористи од Хамас и други исламистички групи на 7 октомври на населби и музички фестивал во јужен Израел, при што брутално беа убиени околу 1.200 луѓе, вклучително и најмалку 850 цивили. Како заложници зеле и околу 240 Израелци и странски државјани.

Израел одговори со бомбардирање на енклавата и отпочнување на копнена офанзива. Здравствените власти во Газа под контрола на Хамас тврдат дека во војната досега загинале 21.300 луѓе.