Израелскиот премиер Бенјамин Нетанјаху денеска ја отфрли можноста за прекин на огнот во војната во Појасот Газа пред целосна елиминација на Хамас.

„Ја продолжуваме војната до крај. Војната ќе продолжи до елиминација на Хамас, до победа. Оние кои мислат дека ќе престанеме, немаат врска со реалноста“, рече Нетанјаху во видео-обраќањето објавено од неговиот кабинет.

„Нема да престанеме да се бориме додека не ги постигнеме сите цели што си ги поставивме: елиминација на Хамас, ослободување на заложниците и отстранување на заканата од Газа“, додаде тој.

„Го напаѓаме Хамас со оган, пеколен оган. Секаде, дури и денес. Ги напаѓаме и оние кои ги поддржуваат од блиску и од далеку. Сите терористи на Хамас, од првиот до последниот, се мртви луѓе. Тие имаат само две опции: да се предадат или да умрат ,” тој рече.

Нетанјаху ова го изјави во време кога лидерот на Хамас Исмаил Ханија денеска во Египет ги започна разговорите за прекин на борбите, што ќе овозможи ослободување на заложниците и испорака на хуманитарна помош во Газа.

Официјален претставник на Хамас, кој сакаше да остане анонимен, денеска во Газа изјави за АФП дека „целосен прекин на огнот и повлекување на израелската окупаторска армија од Газа е услов за какви било сериозни преговори за размена на израелски заложници за палестински затвореници.

Во меѓувреме, ОН разговараат за предлог-резолуција на Советот за безбедност што ќе овозможи брза испорака на хуманитарна помош во Газа. Гласањето веќе двапати беше одложено и земјите-членки бараат добра формулација за да избегнат американско вето. Текстот, кој првично повика на „итен и траен прекин на непријателствата“ во Газа, сега се однесува на „прекинување“ на борбите.