Три лица се уапсени во Данска и едно во Холандија поради планирање терористички напад, соопштија данската полиција и разузнавање.

„Станува збор за група која подготвувала терористички акт. Има врски со странски земји и организиран криминал“, изјави директорот за операции на данската безбедносно-разузнавачка агенција (ПЕТ) Флеминг Дрејер.

Три лица беа уапсени во Данска, а четврто во Холандија, но вклучени се и други во странство, рече тој, без да навлегува во детали. Полицијата соопшти дека ќе ги зголеми своите сили во Копенхаген, но нагласи дека главниот град е „безбеден“. Целта на нападот не е позната. Данската премиерка Мете Фредериксен рече дека акцијата „ја покажува ситуацијата во која се наоѓа Данска“.

„Веќе неколку години можеме да кажеме дека има луѓе кои живеат во Данска и не ни посакуваат добро, кои се против нашата демократија, нашата слобода и данското општество“, рече таа. Разузнавачките служби сметаат дека терористичката закана во земјата е „критична“ и го прогласија четвртото ниво на закана од вкупно пет.