Шефот за надворешна политика на ЕУ, Жозеп Борел, се приклучи на повиците за хуманитарна пауза во конфликтот меѓу Израел и палестинските милитанти Хамас за Газа да добие поголема помош.

„Сега најважно е хуманитарната помош да стигне во Газа“, им рече Борел на новинарите по пристигнувањето на состанокот на министрите за надворешни работи на ЕУ во Луксембург.

Борел рече дека министрите ќе разговараат за повикот на генералниот секретар на ОН Антонио Гутереш за пауза како би се овозможила многу повеќе хуманитарна помош за палестинските цивили да влезе во Газа.

„Не можам да го предвидам исходот од состанокот, но тоа е секако нешто за што министрите ќе треба да разговараат… Генералниот секретар на Обединетите нации многу го бараше тоа“, рече Борел.

„Лично мислам дека е потребна хуманитарна пауза за да се овозможи хуманитарната помош да пристигне и да се дистрибуира“, рече тој.

Сипаници, шуга и дијареа се во пораст во Појасот Газа поради ужасните санитарни услови, објавија во неделата Обединетите нации.