Хрватскиот претседател Зоран Милановиќ денеска во Загреб по средбата со црногорскиот претседател Јаков Милатовиќ изјави дека треба да се забрзаат преговорите меѓу Црна Гора и Европската унија за членство, наведувајќи дека доцнењето на процесот може да се објасни само со неодговорност.
„Како можете да бидете членка на НАТО и да не можете да ги надминете сите овие непредвидени пречки и да станете членка на Европската унија? Ова е реалноста во која живееме и во таа смисла ја имате мојата поддршка“, рече Милановиќ на заедничката прес-конференција.

Милановиќ додаде дека ЕУ „мора да си објасни“ како е можно некои земји, кои влегоа во НАТО пред пет или повеќе години, „се уште не се ни блиску до влез во Унијата“, соопштија од кабинетот на хрватската претседателка.

„Тоа е доцнење кое може да се објасни само со неодговорност и бегање од решенија. Земјите кои се прифатени во НАТО, Црна Гора, Албанија и Северна Македонија, а за кои се протегаат и одолговлекуваат преговорите за влез во ЕУ, всушност свесно и неодговорно се жртвуваат себеси“, рече Милановиќ.

За формирањето на новата црногорска влада, Милановиќ рече дека е важно таа земја да има стабилна влада и да продолжи на патот кон Европската унија.

„Овде нема голема мудрост бидејќи тоа е ваша определба и ваша насока. Ќе ви помогнеме колку што можеме. Врз основа на вашите настапи и говори, гледам дека НАТО и ЕУ се ваша примарна определба, иако тоа не беше целосно јасно пред извесно време“, рече Милановиќ.