Царинската управа на Република Србија од царински магацин во Белград запленила повеќе од 112 тони, односно речиси 111 милиони цигари во вредност од над 15,5 милиони евра. Така, досегашната рекордна заплена од 50 тони од тој акцизен производ е надмината за двојно поголема количина, соопшти Царинската управа.

По долга царинска истрага, утврдено е дека цигарите кои од 2019 година биле испорачани од камионџии од Република Црна Гора, а потоа складирани, мора да бидат одземени поради неверодостојна документација, неточни податоци за стоки и фирми кои учествуваат во постапки за надворешнотрговска размена, од кои некои не постојат ниту во регистрите на фирмите.

„Со конечната одлука на Министерството за финансии се потврдија решенијата на царинските органи за конфискација на стока. Одземената стока ќе биде уништена во постапка пропишана со закон“, соопштија од Царинската управа.

Оттаму наведуваат дека во соработка со полицијата и другите државни органи продолжуваат со решителната борба против шверцот на цигари и други тутунски производи и шверцот на секаков вид стоки, со што се штитат државниот буџет и финансиските и економските интереси на Република Србија и сите нејзини граѓани.