Од почетокот на конфликтот во Судан во април оваа година, околу 500 деца умреле од глад, вклучително и дваесетина бебиња во сиропиталиштето во главниот град Картум, со кое раководи владата, соопшти „Save the Children“.

Организацијата во соопштението рече дека најмалку 31.000 деца немаат пристап до третман за неухранетост и поврзани болести, бидејќи добротворната организација беше принудена да затвори 57 од своите центри за хранење во Судан, пренесува АП.

Судан западна во хаос по неколкумесечните тензии меѓу армијата и ривалската паравоена фракција на 15 април кога ескалираа во отворен вооружен конфликт, претворајќи ги Картум и другите урбани области во боишта.

Многу граѓани на Судан живеат без вода и струја, а здравствениот систем во таа земја е речиси целосно пропаднат.

Се проценува дека најмалку 4.000 луѓе загинале во насилствата во Судан, изјави Лиз Тросел, портпаролка на канцеларијата за човекови права на ОН, но активистите и лекарите на терен велат дека бројот на жртвите е веројатно многу поголем.

Според Агенцијата за миграција на Обединетите нации, повеќе од 4,4 милиони луѓе биле принудени да ги напуштат своите домови и да избегаат од насилството во побезбедни области во Судан или да побегнат во соседните земји.