Руските средношколци во претстојната учебна година, почнувајќи од септември, ќе можат да посетуваат обука за контрола на борбени авиони, објави руското Министерство за образование во својата програма. Руските тинејџери ќе можат да се запознаат со „начините на воена употреба на беспилотни летала“, но и со начинот на „вршење на извидувачки мисии со помош на беспилотни летала“.

Студентите ќе добијат можност да „реализираат конкретни акции на пилотирање на дронови“ и ќе можат да научат како да се бранат од „противнички дронови“. Учениците на возраст од 15 до 17 години ќе можат да ги посетуваат курсевите како дел од „почетната воена обука“.

Оваа воена обука постоела за време на советската ера, а потоа била укината и извесно време престанала да биде дел од училишната програма, но министерството одлучило повторно да ја воведе во учебната 2023-2024 година. Програмата предвидува најмалку 140 часа обука за ракување со оружје како калашникови.

„Воведувањето на овој предмет во училишната настава ќе овозможи систематска подготовка на граѓаните за можна пресметка со непријателот“, изјави во ноември 2022 година иницијаторот на иницијативата, пратеникот Сергеј Миронов. Дроновите се широко користени од двете страни во војната во Украина, а руската територија е речиси секојдневна цел на напади со беспилотни летала.

Од почетокот на конфликтот, во руските училишта беа воведени неколку иновации со цел да се всади кај учениците чувство на патриотизам. Училишната недела започнува со националната химна и свечено подигање на знамето, а воведени се и „дебати за тоа што е важно“, чија цел е да се оправда руската инвазија на соседна Украина.