Поддржувањето на украинските вооружени сили и спротивставувањето на Русија во војната што ја започна ја чини Украина околу 2 трилиони гривни (54 милијарди долари) годишно, изјави украинскиот премиер Денис Шмигал на средбата со украинските амбасадори, цитиран од агенцијата Укринформ.

„Всушност, поддршката за вооружените сили и војната ја чинат Украина околу 2 трилиони гривни. Тоа е повеќе од приходниот дел од буџетот во мирнодопски услови“, рече Шмигал.

Според него, во мирно време, приходниот дел од буџетот на Украина изнесувал 1,3 трилиони гривни (35 милијарди долари). Во моментов, државата опстојува благодарение на финансиската поддршка од партнерите, како и грантови и заеми.

„Изгубивме околу 30 отсто од нашата економија и нашите претпријатија. Изгубивме 3,5 милиони работни места. Во првата година од војната изгубивме 29,5 отсто од нашиот бруто домашен производ (БДП). Претпријатијата се адаптираа и продолжуваат да се прилагодуваат. Оваа година ние очекувајте дури и мало зголемување во однос на минатата година“, прецизираше украинскиот премиер.

Тој истакна дека е можно и зголемување на златните и девизните резерви на Украина на историски максимум.

„Во моментов, Народната банка располага со 39 милијарди долари (девизни резерви). Годинава го намаливме нивото на инфлација на 12,8 проценти на годишно ниво. Вие разбирате каква е инфлацијата во вашите земји, можете да споредите“, рече Шмигал, обраќајќи им се на присутните.