Извештаите на ЕИБ Глобално прикажуваат рекордно инвестирање во 2022 г.
• Речиси 11 милијарди евра во поддршка надвор од Европската Унија, вклучувајќи 4 милијарди евра за најмалку развиените земји
• 1,2 милијарди евра за глобално здравје и вакцини
• 1,7 милијарди евра за Украина за оштетените училишта, болници, возови, трамваи, патишта и мостови
• 824 милиони евра за Западен Балкан за развој на одржлива инфраструктура и мали и средни претпријатија
ЕИБ Глобално, развојниот огранок на Европската инвестициска банка, финансираше 10,8 милијарди евра во 2022 г. Тоа е за 50% повеќе отколку што банката инвестирала во земји надвор од ЕУ во текот на 2021 година. Ова вклучува 1,7 милијарди евра претходно пријавени заеми, пренаменети за брза исплата во Украина, што го илустрира брзиот одговор на банката кон земја соочена со војна. Во 2022 г. Групацијата ЕИБ продолжи да ги поддржува и глобалната здравствена заштита, прифатливата енергија, пристапот до вода, обновливите извори на енергија и одржливиот раст насекаде. Финансирањето за Северна и Потсахарска Африка вкупно изнесуваше околу 4,1 милијарди евра. За земјите од Западен Балкан, банката потпиша заеми од 824 милиони евра, вклучително и над 11 милиони евра во грантови, коишто се очекува да мобилизираат вкупно речиси 3,5 милијарди евра во инвестиции.
„Комплицираната геополитичка ситуација и конфликтите што се случуваат низ светот не треба да нѐ натераат да ја занемариме нашата цел за промовирање глобална, праведна транзиција кон нето-нула.“ – вели Вернер Хојер, претседателот на Европската инвестициска банка. „Ако сакаме да имаме шанса да ги постигнеме целите за одржлив развој на ОН, треба да создадеме одржливи партнерства и сојузи на сите нивоа. Во својата прва година од постоењето, ЕИБ Глобално докажа дека даваме активен придонес во поправеден свет под знамето на Европската Унија, особено преку нашата поддршка за проектите на Глобалната Порта.“
Според деловните извештаи на EIB Global, благодарение на заемите потпишани минатата година, се очекува 11,7 милиони луѓе имаат корист од безбедна вода за пиење, 836 милиони луѓе се вакцинирани против КОВИД-19 и други болести, 141 милион повеќе патувања со јавен превоз.
Заемите од ЕИБ потпишани за нови проекти во 2022 г. во Западен Балкан се очекува да резултираат со 150.000 домашни приклучоци за водоснабдување и комунални услуги, 2,3 милиони патувања годишно на нови или реновирани железници, 34.600 задржани работни места во микро и помали претпријатија.
Според овој извештај, војната во Украина влијаеше врз Западен Балкан, особено преку повисоките цени на храната и енергијата, коишто ја поттикнаа инфлацијата и ги погодија расположливите приходи. Податоците од истражувањето на ЕИБ покажуваат дека побарувачката за кредити останува силна во пресрет на закрепнувањето од пандемијата, но најмногу за финансирање обртни средства, при што банките очекуваат пад на побарувачката за кредити за фиксни инвестиции. Дополнително, понудата на кредити е влошена поради заострените услови за финансирање и се очекува дополнително да слабее.
„Новата организациска структура во рамките на ЕИБ Глобално ни помогна да го зајакнеме нашето присуство во Западен Балкан и да ги поддржиме нашите локални партнери во ублажување на влијанието на повеќе предизвици. Заедно со Европската комисија, мило ни е што го поддржуваме регионот во исполнувањето на своите потреби за урбан развој и инфраструктура на финансиски одржлив, општествено инклузивен и енергетски ефикасен начин.“ – вели потпретседателката на ЕИБ, Лилјана Павлова.
Прочитајте ги Извештаите на ЕИБ Глобално: Влијанието и Приказната
За Европската инвестициска банка и ЕИБ Глобално
Европската инвестициска банка (ЕИБ) е институција на Европската Унија за долгорочно финансирање во сопственост на нејзините земји членки. Финансира стабилни инвестиции коишто придонесуваат за целите на политиката на ЕУ. Групацијата ЕИБ поддржува проекти во четири приоритетни области: инфраструктура, иновации, клима и животна средина, како и мали и средни претпријатија.
ЕИБ Глобално е специјализиран огранок на ЕИБ посветен на операции надвор од ЕУ и клучен партнер за стратегијата на ЕУ за Глобалната порта. Нашата цел е да поддржиме инвестиции од најмалку 100 милијарди евра до крајот на 2027 г., околу една третина од вкупната цел на Глобалната порта. Во рамките на Тим Европа, ЕИБ Глобално негува силни, фокусирани партнерства заедно со другите развојни финансиски институции и граѓанското општество. ЕИБ Глобално ја доближува Групацијата до локалните заедници, компаниите и институциите преку нашите канцеларии низ светот.
