Поморските сили на Европската Унија во петокот пресретнале танкер во Средоземното Море за кој постои сомневање дека е дел од руската „флота во сенка“, со која Москва ги заобиколува западните санкции и продолжува да извезува нафта. Проверка на бродот потврдила дека пловел под лажно знаме, соопшти денеска високата претставничка на ЕУ за надворешна политика, Каја Калас.
Припадници на поморската мисија ИРИНИ се качиле на танкерот на 13 ноември, повикувајќи се на овластувањата од меѓународното поморско право. Станува збор за бродот „МВ Мидаг“, а проверката утврдила дека користел лажно знаме.
Калас на платформата Икс најави дека ЕУ ќе продолжи да ги попречува операциите на руската „флота во сенка“, како на море, така и преку дипломатски мерки.
EU forces from @EUNAVFOR_MED IRINI boarded a suspected Russian shadow fleet tanker in the Mediterranean on 13 November.
The boarding, conducted under Article 110 of the UN Convention on the Law of the Sea, confirmed the MV MIDAG was sailing under a false flag.
The EU will keep disrupting Russia’s shadow fleet at sea and through diplomatic means.
On Monday, EU Foreign Ministers are set to approve new Russia sanctions listings, including on banks, buyers and companies supporting the shadow fleet.
— Kaja Kallas (@kajakallas) November 15, 2026
Таа најави и нови санкции против Русија, за кои министрите за надворешни работи на земјите членки треба да одлучуваат во понеделник. На удар ќе бидат банки, купувачи на руска нафта и компании што финансиски и логистички ја поддржуваат мрежата на танкери.
Руската „флота во сенка“ под сè поголем притисок
Таканаречената „флота во сенка“ ја сочинуваат постари танкери со нејасна сопственичка структура, кои често пловат без соодветно осигурување и користат лажни или таканаречени погодни знамиња.
Москва ги користи овие бродови за да ги заобиколи западните санкции воведени по инвазијата врз Украина и да продолжи со извозот на нафта. Преку сложени корпоративни мрежи и прикривање на потеклото на товарот, танкерите се обидуваат да ги избегнат ограничувањата за транспорт и осигурување.
Европските земји сè повеќе предупредуваат и на безбедносните ризици што ги носат овие бродови, поради што ги засилуваат напорите за разбивање на мрежата што ѝ обезбедува приходи на Русија за финансирање на војната во Украина. Москва досега ги осудуваше ваквите потези, оценувајќи ги како непријателски.
