Кластер главоболките се сметаат за еден од најинтензивните облици на болка што може да ги доживее човекот. Истражувањата на американски научници покажаа дека пациентите ги доживуваат како поболни од породувањето, панкреатитисот или камењата во бубрезите. На скала од 1 до 10, тие ѝ доделија просечна оценка од 9,7, при што речиси 72 отсто од испитаниците ѝ ја дадоа највисоката можна оценка.

Студијата беше предводена од неврологот Марк Буриш и неговите колеги, а резултатите беа објавени кон крајот на 2020 година во научното списание Headache.

Во меѓународното истражување учествуваа 1.604 лица кои страдаат од кластер главоболки. Од учесниците беше побарано да го оценат интензитетот на своите напади на скала од 0 до 10; оние кои во текот на животот доживеале и други болни состојби, беа замолени да ги оценат и нив.

Вкупно 1.157 учесници – односно 72,1 отсто – им ја доделија највисоката можна оценка на нападите од кластер главоболка.

Врз основа на нивните одговори, беа идентификувани пет болни состојби кои добија највисоки просечни оценки.

1. Кластер главоболка – 9,7/10

Кластер главоболките убедливо го зазедоа првото место. Оваа состојба вклучува исклучително интензивна болка која обично се јавува на едната страна од главата, најчесто во пределот околу едното око. Еден напад може да трае до три часа, а во текот на денот може да се случат неколку такви напади.

Карактеристично е тоа што овие напади се јавуваат во циклуси – таканаречени „кластери“ – кои можат да траат со недели. Неврологот Марк Буриш за „Тексас Медикал Центар“ (Texas Medical Center) објасни дека овој тип на главоболка често погрешно се дијагностицира како инфекција на синусите. Ова е така бидејќи, покрај интензивната болка, таа може да биде придружена со солзење на очите и течење на носот.

2. Болка при породување – 7,2/10

Болката при породување се најде на второто место, со просечна оценка од 7,2. Оваа болка беше оценета од испитанички кои се породиле, а истовремено страдаат и од кластер главоболки. Во истражувањето учествуваа вкупно 308 лица.

3. Акутен панкреатитис – 7,0/10

Третото место му припадна на акутниот панкреатитис – ненадејно воспаление на панкреасот. Испитаниците ѝ доделија на оваа состојба просечна оценка од 7,0. Станува збор за здравствена состојба која може да предизвика исклучително силна болка во горниот дел од стомакот, често придружена со гадење и повраќање.

4. Камења во бубрезите – 6,9/10

На четвртото место се наоѓа бубрежната колика – болка што се јавува кога камен ќе се придвижи од бубрегот и ќе помине низ уринарниот тракт. Просечната оценка доделена од учесниците во истражувањето изнесува 6,9.

5. Камења во жолчката – 6,3/10

Листата од петте најинтензивни болки ја заокружуваат камењата во жолчката, кои добија просечна оценка од 6,3.

Други болни состојби што не влегоа во првите пет се прострелните рани (со оценка 6,0) и хернија на дискот.

Авторите на студијата наведоа неколку ограничувања што е важно да се имаат предвид при толкувањето на резултатите. Учесниците го проценувале интензитетот на болката ретроспективно – преку присетување на минати искуства – што значи дека нивните оценки не мора нужно да соодветствуваат на реалниот интензитет на болката што ја почувствувале во тој момент.

Понатаму, сите други болни состојби беа оценети врз основа на искуствата на поединци кои веќе страдаат од кластер главоболки. Следствено, овие резултати не треба да се толкуваат како дефинитивна, универзална скала за најинтензивната болка што може да ја доживее еден човек.