Полска се соочува со сериозна институционална криза по суспендирањето на претседателот на Уставниот трибунал, Богдан Швенчковски, и распоредувањето полиција околу седиштето на оваа институција во Варшава. Случувањата дополнително го заострија политичкиот судир меѓу претседателот Карол Навроцки и премиерот Доналд Туск.

Навроцки ја прекина посетата на Сенегал и се врати во земјата по ескалацијата на кризата, која полските медиуми ја толкуваат на различни начини. Додека едни случувањата ги оценуваат како обид за деблокирање на правосудството, други предупредуваат на незаконско преземање на една од најважните државни институции.

Либералните и провладини медиуми главно ги поддржуваат аргументите на владата на Туск, која тврди дека Уставниот трибунал со години бил под политичко влијание на претходната власт, предводена од партијата Право и правда (ПиС).

Весникот „Газета Виборча“, кој важи за еден од највлијателните медиуми наклонети кон политичката опција на Туск, кризата ја проследи со наслов: „Кризата околу Уставниот трибунал мораше да биде пресечена“.

Во коментар на новинарот Бартош Вјелински се наведува дека, според неговото толкување, непочитувањето на владеењето на правото од страна на лидерот на ПиС, Јарослав Качињски, Швенчковски и Навроцки повеќе не можело да се толерира.

Во друг текст, посветен на вечерната ескалација, весникот пишува за суспендирањето на Швенчковски, обидите на демонстрантите да ја пробијат оградата на Трибуналот и враќањето на претседателот Навроцки од Сенегал.

Како непосреден повод за кризата се посочува одбивањето на претседателот да ги прими заклетвите на новите судии избрани во парламентот. Според аргументите на владата, со тоа е оневозможено нормалното функционирање на Уставниот трибунал.