Канада се приклучува на европската мрежа на суперкомпјутери во рамки на соработката со Европската Унија за зајакнување на компјутерските капацитети неопходни за развој на вештачката интелигенција, објави „Политико“.

Претседателката на Европската комисија, Урсула фон дер Лајен, потврди дека Канада станува дел од мрежата, со што канадските компании, стартапи и истражувачи ќе добијат пристап до европските суперкомпјутери.

„Во комбинација со напредната канадска индустрија за вештачка интелигенција, ова ќе ни овозможи да развиваме висококонкурентни, иновативни и безбедни системи за вештачка интелигенција“, изјави фон дер Лајен.

Со европската мрежа управува заедничкото претпријатие „ЕуроХПЦ“, јавно-приватно партнерство на ЕУ со буџет од 8,2 милијарди евра. Мрежата опфаќа 14 суперкомпјутери, од кои некои се меѓу десетте најмоќни во светот, 19 специјализирани центри за развој на вештачка интелигенција и 10 квантни компјутери.

Планирана е и изградба на седум големи центри за податоци за вештачка интелигенција, таканаречени гигафабрики, со вкупна инвестиција од 30 милијарди евра. Нивната изградба треба да започне следната година.

Експертите ја поздравуваат соработката, но предупредуваат дека таа засега нема значително да ја намали технолошката зависност од САД.

Антон Лајхт од Фондацијата „Карнеги“ за меѓународен мир оценува дека поврзувањето на европските и канадските компјутерски капацитети е важен прв чекор, но дека за вистинска независност ќе бидат потребни многу поголеми инвестиции во инфраструктурата.

Приклучувањето на Канада претставува продолжување на досегашната соработка со ЕУ преку истражувачката програма „Хоризонт Европа“. Во европската мрежа на суперкомпјутери досега учествувале 38 земји, вклучително и држави надвор од Унијата.