Непознати лица влегле во геронтолошкиот центар во Младеновац, каде што е сместено избирачко место, и вршеле недозволен притисок врз гласачите, меѓу кои и неподвижни лица, соопшти претседателот на Републичката изборна комисија (РИК), Владимир Димитријевиќ.

Според него, лицата се претставиле како набљудувачи. За инцидентот веднаш била известена полицијата, која излегла на терен. Димитријевиќ рече дека повеќе информации се очекуваат на следната прес-конференција.

Тој додаде дека, според извештаите на локалните изборни комисии и избирачките одбори, гласањето генерално се одвива регуларно. Регистрирани биле помали инциденти и неправилности, кои во најголем дел биле решени од избирачките одбори, а во случаите кога тоа не било можно, интервенирала полицијата.

Димитријевиќ ги повика граѓаните да се воздржат од недозволени активности и надвор од избирачките места, нагласувајќи дека за таквите случаи надлежните мерки ги преземаат полицијата и обвинителството.