Германија разгледува промени на пазарот на трудот што би можеле да влијаат и врз работниците од Западен Балкан. Меѓу предложените мерки се воведување можност за 12-часовен работен ден во одредени случаи, намалување на годишната квота за работници од регионот и построги правила за полагање испити по германски јазик.
За можните промени за „Н1“ говорел новинарот на „Дојче веле“, Мехмед Смајиќ, посочувајќи дека Германија истовремено се соочува со недостиг од околу 148.000 квалификувани работници потребни за реализација на големите инфраструктурни проекти.
Можни смени од 12 часа
Германската влада разгледува измени на Законот за работно време со кои би се овозможило вработените во одредени случаи да работат и по 12 часа дневно.
Според сегашните правила, работното време вообичаено е ограничено на осум часа дневно, со можност да се продолжи до десет часа, под услов дополнителните часови да се надоместат со пократко работно време во друг период.
Со предложениот модел, работното време би се пресметувало на неделно ниво. Тоа би значело дека вработените во некои денови би можеле да работат подолго, а во други пократко или да имаат повеќе слободни денови.
Работодавците ја поддржуваат поголемата флексибилност, додека синдикатите предупредуваат на можните последици врз здравјето на работниците и семејниот живот. Подолгите смени не би значеле автоматски и повисока плата.
Квотата за работници од Западен Балкан се намалува за половина
Една од најзначајните најавени промени се однесува на Правилото за Западен Балкан, преку кое граѓаните од регионот можат да добијат германска работна виза по поедноставена постапка.
Според најавите, од јануари 2027 година годишната квота би се намалила од 50.000 на 25.000 работници. Мерката би ги опфатила и државјаните на Србија.
Податоците на германската Сојузна агенција за вработување покажуваат дека во септември во Германија биле вработени околу 546.000 луѓе од Западен Балкан. Од нив, 53 проценти работеле на работни места за кои се бараат најмалку квалификации на стручен работник.
Агенцијата за вработување се противи на намалувањето на квотата, предупредувајќи дека тоа би можело дополнително да го отежне обезбедувањето работна сила, особено во градежништвото, транспортот, логистиката и угостителството.
Германија за инфраструктурни проекти издвоила 500 милијарди евра, но, според податоците на Институтот за германска економија, ѝ недостигаат околу 148.000 квалификувани работници. Особено се бараат електричари, механичари и инсталатери за греење и климатизација.
Построги правила за испитите по германски јазик
Промени се најавуваат и кај испитот DTZ, кој се користи за докажување на познавањето на германскиот јазик, вклучително и на нивото Б1.
Според објавените информации, од 1 ноември треба да стапат во сила построги правила, според кои кандидатите повеќе нема да можат целосно да го прескокнат писмениот дел од испитот, а сепак да добијат потврда за нивото Б1.
Ова ниво на јазично познавање е важно за остварување одредени права поврзани со престојот и за стекнување германско државјанство.
Промените првенствено би се однесувале на кандидатите што допрва ќе полагаат. Оние што веќе поседуваат соодветен сертификат нема автоматски да мора повторно да го полагаат испитот.
