Естонија ги преместува клучните воени единици поблиску до границата со Русија како дел од новата стратегија за „активна одбрана“, објави британскиот „Фајненшл тајмс“, повикувајќи се на естонски воени, разузнавачки и одбранбени претставници.

Според весникот, елитните единици трајно се преместуваат од главната естонска воена база во Тапа на позиции поблиску до источната граница на земјата. Првата естонска бригада, која ја командува полковник Тармо Кундла, ќе биде преместена од Тапа во Јихва, околу 50 километри од границата со Русија, каде што се градат нови објекти за сместување на војници.

„Мора да почнеме од границата и да победиме од првите битки“, рече Кундла.

Во Нарва се гради и нова база, која ќе може да смести до 1.000 војници. Во исто време, Естонија инвестира во системи со подолг дострел, вклучувајќи ги американските повеќецевни ракетни системи „Хајмарс“ и јужнокорејските системи „Чунму“.

„Фајненшл тајмс“ наведува дека во мај, Естонија го вклучила концептот на „активна одбрана“ во својата одбранбена политика, по што започнала поширока реорганизација на вооружените сили.

Естонските воени и разузнавачки претставници не веруваат дека Москва има намера да започне конфликт од големи размери со НАТО во следните две години, но се плашат од можноста за ограничена воена акција што би можела да ја тестира подготвеноста на Алијансата за колективна одбрана.

Москва постојано ги отфрла тврдењата дека има намера да нападне една од членките на НАТО.