Шолја кафе е нешто по кое многумина од нас посегнуваат барем еднаш дневно, а истражувачите долго време се заинтересирани за здравствените придобивки и ризици поврзани со редовното внесување кофеин.
Во нова студија, објавена во „Европскиот журнал за исхрана“, истражувачите конкретно ја проучувале поврзаноста на кафето со метаболитите, т.е. хемиските супстанции што се произведуваат од природни процеси во телото, кардиометаболните индикатори, кои укажуваат на здравјето на срцето и регулирањето на шеќерот во крвта, како и половите хормони како што е тестостеронот, објавува Science alert.
Тим истражувачи, предводен од експерти од Универзитетот во Оулу во Финска, открил дека луѓето кои пијат повеќе кафе генерално имаат помалку складирани масти во телото и поголема маса на скелетни мускули, односно мускули што овозможуваат движење, иако нивните вредности на индексот на телесна маса (ИТМ) беа претежно слични.
Сепак, анализата на половите хормони привлече најголемо внимание.
Кај мажите, поголемата консумација на кафе беше поврзана со поповолна врска помеѓу гликозата и инсулинот, повисоки концентрации на вкупен и достапен тестостерон, како и повисоки нивоа на глобулин што ги врзува половите хормони (SHBG), протеин што ги транспортира половите хормони низ крвта.
Кај жените, овие врски беа послаби. Поголемата консумација на кафе беше поврзана со повисоки нивоа на SHBG и помала количина на слободно достапни андрогени хормони, група полови хормони што го вклучува тестостеронот.
Меѓу другите резултати, истражувачите открија дека поголемиот внес на кафе е поврзан со пониски нивоа на аминокиселини со разгранет ланец (BCAA). Прекумерните концентрации на овие протеински компоненти во крвта претходно беа поврзани со полошо метаболичко здравје.
„Инверзната врска помеѓу внесот на кафе и нивоата на BCAA во крвта кај мажите и жените е особено значајна“, наведоа истражувачите, додавајќи дека „иако BCAA се есенцијални аминокиселини вклучени во важни метаболички сигнални патишта, нивните хронично покачени нивоа се силно поврзани со инсулинска резистенција, дијабетес тип 2, кардиоваскуларни заболувања, масна болест на црниот дроб и зголемен ризик од хипертензија“.
Резултатите, според тоа, укажуваат дека кафето може да има поволен ефект врз метаболичкото здравје и дека хормоналните патишта би можеле да бидат дел од објаснувањето. Истражувачите ја проучуваат оваа врска подетално во последниве години.
„Групите со поголемо вообичаено внесување кафе имале помалку телесни масти, внесувањето кафе било обратно пропорционално со нивоата на BCAA во крвта кај двата пола и било независно поврзано со специфичен хормонален профил кој се разликувал меѓу половите и може да биде значаен за метаболизмот, особено кај мажите“, навеле авторите на студијата.
Од можно подобрување на расположението до зголемување на нивото на холестерол, многу истражувања се посветени на ефектот на кафето врз човечкото тело. Со оглед на тоа што овој пијалок содржи повеќе од илјада биоактивни соединенија, сè уште има многу што треба да се истражи.
