Шведската војска ќе учествува во надзорот и заштитата на финската територија со борбени авиони барем до крајот на 2026 година, објавија денес Финските одбранбени сили.

„Шведската опрема особено го зајакнува воздушниот надзор, ослободувајќи ги сопствените ресурси на Финските одбранбени сили за одвраќање на инциденти, доколку е потребно“, соопшти финската војска.

Соседните земји, двете најнови членки на НАТО, веќе имаат тесна билатерална одбранбена соработка. Финска има источна граница долга 1.340 километри со Русија.

„Шведска одговори на барањето на Финска за зајакнување на својата воздушна одбрана поради влошената безбедносна ситуација“, изјави шведскиот министер за одбрана Пол Џонсон за „Ројтерс“, додавајќи дека шведските вооружени сили, според договорот, доколку е потребно, би можеле да ѝ помогнат на Финска да одбие повреда на финска територија.

„Покрај борбени авиони, борбени бродови и беспилотни летала, Шведска би можела да придонесе и со копнени системи за одбрана од беспилотни летала“, рече тој.

Воените беспилотни летала што залутаа во воздушниот простор на Финска, Естонија, Латвија и Литванија предизвикуваат загриженост дека војната во Украина се прелева на северните граници на НАТО со Русија.

Украина ги засилува нападите врз руските пристаништа за извоз на нафта на Балтичкото Море, но некои од нејзините беспилотни летала ги промашија своите цели и активираа безбедносни предупредувања во соседните земји.