Министерството за внатрешни работи информира за повеќе случаи на семејно насилство и закани регистрирани во изминатите 24 часа, како и за две поднесени кривични пријави.

Во Гостивар, 80-годишен маж од селото Лакавица пријавил дека по кратка расправија бил физички нападнат од неговиот син. Случајот се документира.

Во Охрид, полициски службеници го лишиле од слобода 21-годишниот М.П., откако било пријавено дека бил агресивен кон член на своето семејство. По целосното расчистување на случајот, против него ќе биде поднесена соодветна пријава.

Во Скопје, 44-годишна жена пријавила дека била физички нападната од својот 42-годишен сопруг во семејниот дом на подрачјето на Центар. Полицијата презема мерки за расчистување на случајот.

Во меѓувреме, Надворешната канцеларија за криминалистички работи Струга поднесе кривична пријава против 54-годишен жител на струшко поради сомнение за кривично дело „загрозување на сигурноста“, бидејќи упатувал закани кон својата сестра и соседи.

Кривична пријава за истото дело е поднесена и против 49-годишен тетовец, кој, според МВР, телефонски и на работното место ѝ упатувал закани на својата сопруга.