Официјалната објава за трансферот на Јан Диоманде во Реал Мадрид е одложена поради спор меѓу две менаџерски агенции. Спорот е помеѓу „Максидел Менаџмент“, во сопственост на Макс Градел, и „Рок Нејшн“, мултинационалната компанија на раперот Џеј-Зи.

„Максидел“, која посредуваше во трансферот на Диоманде од Леганес во Лајпциг минатата година, поднесе жалба до ФИФА. Тие тврдат дека Реал Мадрид преговарал со агенцијата „Рок Нејшн“, која моментално го застапува играчот, и дека нивниот претходен договор бил прекршен, пишува „АС“.

Ве потсетуваме дека експертот за трансфери Фабрицио Романо минатата недела објави дека Диоманде се согласил на трансфер во Реал Мадрид за сума „поголема од 100 милиони“, а „ESPN“ подоцна објави дека станува збор за трансфер вреден 122 милиони евра со дополнителни десет милиони бонуси.

Спорот не е само внатрешен проблем меѓу двете менаџерски агенции, бидејќи директно влијае на трансферот меѓу германскиот клуб и Реал. Според прописите на ФИФА, ситуацијата може да ја комплицира регистрацијата на фудбалерот.

Реал Мадрид наведува дека не знаеле за постоењето на спорот и сметаат дека тој не го засега клубот. Тие очекуваат дека одлуката на крајот ќе биде во нивна корист, но засега реализицијата на трансферот е ставена на чекање.

Издавањето на привремена лиценца за Диоманде се споменува како можно решение додека не се реши правниот дел од операцијата, бидејќи сите други елементи се договорени. Износите и начинот на плаќање кон Лајпциг се дефинирани, документацијата е подготвена, а договорот на играчот е составен.

Сепак, сè зависи од ФИФА, која ја прими жалбата и ја разгледува. Меѓународната фудбалска федерација строго ја регулира работата на менаџерите и може да одложи или дури и да одбие да внесе трансфер во системот доколку има спор околу правото на застапување.

Исто така, во интерес на клубовите е ситуацијата да биде правно чиста, бидејќи плаќањето на провизијата на погрешна страна може да резултира со казни. И покрај ова, ФИФА често се потпира на трудовото право во пракса и го штити правото на работа на играчите, дури и ако договорот е еднострано раскинат. Барањето надомест во тој случај е посебна постапка.

Диоманде така се најде во центарот на менаџерската „војна“. Агенцијата „Максидел“ го управуваше неговиот трансфер во Лајпциг, а на својот Инстаграм профил сè уште го истакнуваат соопштението од потпишувањето на тој договор. Лајпциг му даде дозвола на „Максидел“ да преговара за продажба на младиот десен крилен играч.

Проблемот се појави бидејќи пред неколку месеци Диоманде одлучи да соработува со агенцијата „Рок Нејшн“, која има силно влијание во фудбалот и претставува ѕвезди како Винисиус и Ендрик.

За време на одморот во САД по Светското првенство, играчот ги посети канцелариите на компанијата во Њујорк. Тој беше и гостин на концертот на Џеј-Зи на стадионот на Јенкис, каде што го угости Мајкл Јормарк, претседателот на спортскиот оддел на компанијата. Реал Мадрид водеше преговори со Рок Нејшн, што доведе до тужба.

Foto/ Depositphotos