Иранскиот министер за надворешни работи Абас Арагчи прифатил компромисен договор за отворање на Ормутскиот теснец, што било една од причините американскиот претседател Доналд Трамп да ја стави на чекање воената операција против Иран, објави израелскиот Канал 12, повикувајќи се на два дипломатски извори запознаени со текот на преговорите.

Според извештаите, предлогот предвидува бродовите кои влегуваат во Персискиот Залив преку Ормутскиот теснец да минуваат низ ирански територијални води, додека излезот од Заливот би се одвивал преку територијалните води на Оман.

Дипломатите наведуваат дека и Оман го прифатил предлогот, но побарал дополнително појаснување од Техеран дали договорот што го постигнал Арагчи ја има и поддршката од Иранската револуционерна гарда, една од најмоќните воени и политички структури во земјата.

Во меѓувреме, катарски посредници продолжуваат со разговорите со иранските власти за да обезбедат поддршка од Револуционерната гарда за евентуалниот договор.

Трамп: Нападите се одложени ако брзо се постигне договор

Американскиот претседател Доналд Трамп претходно објави дека планираниот бран нови воени напади врз Иран е ставен на чекање поради напредокот во дипломатските разговори.

Во објава на платформата Truth Social, Трамп порача дека прекинот на подготовките за напад е условен со брзо постигнување договор со Техеран.

Тој наведе дека американските сили биле подготвени да дејствуваат со „полна сила“, но дека Иран и други земји од регионот побарале од Вашингтон да се воздржи од напад бидејќи биле договорени рамките на потенцијалниот договор.

Според Трамп, договорот би вклучувал целосно и итно отворање на Ормутскиот теснец, како и завршување на иранската нуклеарна закана. Тој додаде дека и Израел би го почитувал таквиот договор.

Иранските власти и другите земји вклучени во разговорите засега не го потврдија договорот.

Напнатоста околу Ормутскиот теснец

Ормутскиот теснец е една од најважните светски поморски точки, бидејќи низ него поминува значителен дел од глобалниот транспорт на нафта и гас од Персискиот Залив кон светските пазари.

Поради неговото стратешко значење, секоја закана за блокада или нарушување на пловидбата низ теснецот предизвикува загриженост на меѓународните пазари и страв од нов раст на цените на енергенсите.

Рубио: Иран никогаш немал противник како Трамп

Американскиот државен секретар Марко Рубио изјави дека иранскиот режим никогаш претходно не се соочил со претседател како Доналд Трамп, кој, според него, е подготвен да преземе конкретни мерки за спречување на развојот на иранската нуклеарна програма.

Рубио оцени дека Техеран со децении ја користел воздржаноста на меѓународната заедница за да ги избегнува последиците од своите политики и истовремено да ги зајакнува воените способности.

Тој тврдеше дека американските дејствија значително ја ослабнале иранската воена инфраструктура, вклучително и делови од морнарицата, воздухопловството, противвоздушната одбрана, ракетните системи и производството на воена опрема.

Сепак, Рубио нагласи дека Иран и понатаму располага со ракети и беспилотни летала со кои може да предизвика штета, но дека повеќе нема исто ниво на заштита како порано.

Според него, токму поради променетата воена рамнотежа Техеран сега е поспремен да разговара за договори поврзани со нуклеарната програма и слободата на пловидба низ Ормутскиот теснец.

Рубио додаде дека целта на САД не е промена на власта во Иран, туку промена на политиките на Техеран, особено во однос на регионалното влијание и поддршката на вооружени групи.