Хрватскиот фудбалски репрезентативец, Лука Модриќ, потпиша нов едногодишен договор со Милан, соопшти италијанскиот клуб.

Со новиот договор, Модриќ ќе остане на „Сан Сиро“ до летото следната година.

Еден од најдобрите играчи за врска на 21. век во Милан пристигна минатото лето како слободен играч, откако ја заврши својата долга и успешна кариера во Реал Мадрид. Неговиот договор истече на крајот од минатата сезона, по што размислуваше дали да ја продолжи кариерата.

Четириесетгодишниот Модриќ решил да остане во Милан по разговорот со новиот тренер Рубен Аморим, кој јасно му ставил до знаење дека смета на неговото искуство и лидерски квалитети.

Следната сезона Модриќ ќе заработува околу 3,5 милиони евра нето, со можност за дополнителни бонуси.

Минатата сезона искусниот играч за врска постигна два гола и забележа три асистенции на 34 натпревари во Серија А.

На четирите првенствени натпревари што ги пропушти, Милан забележа само една победа. Во последното коло, кога се решаваше пласманот во Лигата на шампионите, Модриќ одигра само 28 минути, а Милан беше поразен од Каљари на домашен терен и остана без место во елитното европско натпреварување.

Модриќ ја предводеше и хрватската репрезентација на Светското првенство, каде што Хрватска стигна до осминафиналето, во кое беше елиминирана од Португалија.