Две од трите главни американски телевизиски мрежи, NBC и ABC, како и CNN, не го емитуваа обраќањето на Доналд Трамп во ударниот термин во четвртокот, што го натера американскиот претседател да каже дека биле вклучени во заговор и дека треба да им бидат одземени лиценците.

„Каналите за лажни вести NBC и ABC рекоа дека нема да го пренесуваат мојот говор. Ваквата измама треба да значи одземање на нивните лиценци“, рече Трамп, според Ројтерс.

Експертите велат дека телевизиските станици имаат широки права според Првиот амандман да одлучат што да емитуваат, но додаваат дека, историски гледано, тие емитувале поголем дел од таквите говори, бидејќи станува збор за информации од јавно значење.

Во говорот, Трамп ги декласификуваше разузнавачките информации за кои рече дека покажуваат кинеско мешање во изборите во САД, и покрај тоа што американските разузнавачки агенции не пронајдоа докази дека Пекинг влијаел на исходот од изборите во 2020 година.

Со години, Трамп сееше сомнежи за исходот од изборите, лажно тврдејќи дека неговиот пораз од Џо Бајден во 2020 година бил наместен, а без докази тврдеше и дека гласањето по пошта е полно со измами, дека машините за гласање се предмет на манипулации и дека гласањето на странски државјани е широко распространето, пишуваат медиумите.

Телевизијата Си-Би-Ес го емитуваше говорот на Трамп, но го прекина емитувањето по околу 15 минути за да ги побие неговите тврдења за изборна измама.