САД вечерва започнаа нов бран воздушни напади против Иран, шеста ноќ по ред, објави американската војска.

Нападите започнаа во 20:00 часот по македонско време, а нивната цел е „дополнително да ги ослабат воените капацитети на Иран“, објави Централната команда на американската армија (CENTCOM) на платформата X.

Островот Кешм и Бандар Абас се погодени
Иранските државни медиуми објавија дека американските ракети го погодиле подрачјето на островот Кешм, кој се наоѓа покрај Ормускиот теснец, и неколку локации во Бандар Абас, најголемото пристаниште во Иран и важно упориште на иранската морнарица и Револуционерната гарда.

Напади беа пријавени и во Бушер, градот каде што се наоѓа единствената нуклеарна централа во Иран. Досега нема потврда дека самата електрана е погодена, ниту пак непосредни податоци за штетите и жртвите во последниот бран напади.

Судирите избувнаа на 7 јули
Судирите меѓу Вашингтон и Техеран повторно се разгореа на 7 јули, по иранските напади врз бродовите што пловат низ Ормускиот теснец. Потоа САД повторно воспоставија поморска блокада на иранските пристаништа и започнаа секојдневни напади врз иранските воени позиции, особено по должината на јужниот брег и теснецот.

Иран одговори со ракетни и напади со дронови врз американските воени бази во соседните земји. Техеран денес објави дека нападнале воени цели во Јордан, Кувајт и Бахреин, земји каде што се стационирани американските сили. Немаше непосредна потврда за големи штети или жртви.

Ормускиот теснец е речиси блокиран
Борбите повторно речиси целосно го запреа сообраќајот во Ормускиот теснец, клучен превозен пат за глобалниот извоз на нафта и гас. Иран инсистира бродовите да минуваат низ коридор по должината на неговиот брег, додека Вашингтон се обидува да ги пренасочи поблиску до брегот на Оман.