Кристијано Роналдо се збогува со светските првенства со емотивна порака по елиминацијата на Португалија од Шпанија (1:0) во осминафиналето на Светското првенство.

Тој истакна дека ја напушта репрезентацијата „со чиста совест“, но и потсети на успесите што ги постигна репрезентацијата во неговата ера.

Легендарниот капитен на Португалија не можеше да ги скрие солзите по поразот во Далас, каде што голот на Микел Мерино во првата минута од судиското продолжение ја однесе Шпанија во четвртфиналето.

Роналдо потврди дека ова е неговиот последен настап на Светското првенство, додека го остави отворено прашањето за неговото пензионирање од репрезентацијата.

„Секогаш е тажно да се биде елиминиран од големо натпреварување. Одигравме добар натпревар и мислам дека исходот можеше да биде и поинаков. Шпанија имаше малку среќа што постигна гол на крајот, но тоа е фудбалот. Дадовме се од себе и кога е така, немаме за што да жалиме“, рече Роналдо.

Неговата изјава за репрезентативното наследство привлече најголемо внимание.

„Заминувам со чиста совест. Освоив три трофеи со Португалија, а пред Кристијано Роналдо, Португалија не освои ниту еден. Задоволен сум. Најголемиот успех е Европското првенство во 2016 година, кое за мене има иста тежина како и освојувањето на Светското првенство. Утре е нов ден, животот продолжува“, рече 41-годишниот напаѓач.

Роналдо објасни и зошто не можеше да ги сокрие емоциите по натпреварот.

„Имаше солзи, но и чувство на олеснување, бидејќи знам дека дадов апсолутно сè за националниот тим. Кога ќе го оставиш срцето на теренот, немаш за што да се жалиш.“

Foto/ EPA