Три кривични пријави се поднесени за случаи на семејно насилство во Гостивар и Свети Николе, информира Министерството за внатрешни работи.

Надворешната канцеларија за криминалистички работи Гостивар поднела кривична пријава против Ќ.Х. (49) поради сомнение за две кривични дела – „телесна повреда“ и „загрозување на сигурноста“. Според МВР, на 30 јуни во домот на родителите на неговата сопруга во Гостивар, тој со возило ја оштетил влезната порта, удрил во паркирано возило и оштетил прозорец од куќата, а потоа физички ја нападнал сопругата.

Во друг случај, кривична пријава е поднесена против И.М. (51) од Гостивар поради сомнение за „телесна повреда“. На 29 јуни, во семејниот дом во Гостивар, тој физички ја нападнал сопругата.

Кривична пријава е поднесена и против И.П. (18) од Свети Николе поради сомнение за „загрозување со опасно орудие при тепачка или караница“. На 16 јуни, во двор од куќа, по претходна расправија, таа ѝ упатувала закани на својата мајка со остар предмет.