Репрезентативецот на Брегот на Слоновата Коска, фудбалер на РБ Лајпциг, Јан Диоманде (19), отворено ја изрази својата симпатија кон ПСЖ и призна дека еден ден би сакал да игра за клубот од „Паркот на принцовите“. Неговите коментари доаѓаат во услови на зголемени шпекулации за неговата иднина по одличната сезона во Бундеслигата.
Во разговор со новинарите, Диоманде потврди дека би му било чест да го носи дресот на актуелниот европски шампион.
„Да, би ми било задоволство да дојдам и да играм овде, во еден од најголемите клубови во светот. Секогаш сум среќен кога доаѓам во Париз и не мислам дека адаптацијата би ми била проблем бидејќи зборувам француски. Зошто да не? Сепак, во моментов сум играч на Лајпциг“, изјави Диоманде за француски „Телефут“.
Неговата поврзаност со клубот беше дополнително нагласена со неговиот коментар за неодамнешниот триумф на ПСЖ во Лигата на шампионите.
„Беше убаво да се види ПСЖ како повторно победува и освојува уште една Лига на шампиони. Мојот татко беше навивач на ПСЖ, па затоа бев особено среќен што го гледав нивниот успех“, рече тој.
Кога директно беше прашан дали би сакал да ја дели соблекувалната со ѕвездите на парискиот клуб, тој не остави простор за сомнеж. „Да, би сакал. Навистина би сакал“, рече кратко.
Ваквите изјави сигурно дополнително ќе ги поттикнат шпекулациите за можен трансфер во Париз. ПСЖ бара засилувања за да обезбеди континуирана доминација по историскиот европски успех на тимот предводен од Луис Енрике.
Диоманде има одлична сезона зад себе и е мета на големи клубови, меѓу кои, заедно со ПСЖ, се споменуваат Ливерпул и Баерн.
Тој постигна 12 гола во Бундеслигата минатата сезона, а неговата пазарна вредност се проценува на 90 милиони евра; според проценките на медиумите, Лајпциг нема да се согласи на обештетување помало од 100 милиони евра.
Диоманде во наредниот период има обврски кон националниот тим. Со Брегот на Слоновата Коска тој ќе одигра пријателски натпревар против Франција како дел од подготовките за Светското првенство, каде што неговата репрезентација ќе игра во група со Германија, Еквадор и Курасао.
Foto/ depositphotos
