Жена од Кентаки е уапсена под обвинение за злоупотреба на деца откако го истетовирала својот едногодишен син во својот дом. Полицијата на државата Кентаки одговорила на пријава за злоупотреба и открила траги од мастило за тетовирање на раката на момчето, пишува „Унилад“.
27-годишната Брук Мекданиел беше уапсена пред една недела откако полицајците го посетиле нејзиниот дом во Монтичело, округот Адаир. Според налогот за апсење, мајката користела машина за домашна тетоважа за да остави трајно мастило на кожата на својот 22-месечен син. Во сојузната држава Кентаки, тетовирањето деца под 16 години се смета за напад или злоупотреба на деца.
Откако пристигнала полицијата, Мекданиел признала дека мастилото завршило на кожата на детето, но инсистирала дека станува збор за несреќа. Таа изјавила дека „си ја тетовирала ногата, а детето дошло и ја ставило раката под уредот“.
Државните полицајци известиле дека го прегледале детето на местото на настанот и забележале „тетоважа во форма на црна точка на десната подлактица со црвенило околу неа“, што го потврдило добиениот извештај, објави Lex18.
Сепак, полицискиот извештај открива дека изјавите на сведоците се спротивни на приказната на мајката. Неколку сведоци им кажале на полицајците дека МекДаниел го тетовирала детето по негово барање. Според нив, таа им објаснила дека тоа е „точка за забава“ и дека самото момче сакало тетоважа.
МекДаниел сега се соочува со обвинение за напад од четврти степен, или злоупотреба на дете, за инцидентот во кој нејзиниот едногодишен син останал со мала црна точка. Таа е приведена во регионалниот затвор во округот Адаир со кауција од 5.000 долари за прекршок од класа А. Датумот на појавување пред суд сè уште не е објавен.
Тврдењето на мајката дека случајно го истетовирала детето е спротивно на државните прописи за тетовирање. Државните прописи на Кентаки конкретно наведуваат дека тетовирањето не може да се врши врз малолетник без согласност на родител или старател. Исто така, се предвидува дека малолетникот мора да има најмалку 16 години за да биде истетовиран со согласност на родител.
Случајот беше упатен и до Центарот за социјална работа откако беа откриени „ужасни“ услови за живот на нејзиниот имот во Монтичело. Реакциите на апсењето за една точка мастило на раката на детето беа поделени.
Некои застанаа во одбрана на мајката. „Мислам дека апсењето на мајката е значително потрауматично за детето отколку истетовираната точка“, рече еден сведок. Од друга страна, многумина не ја разбраа одбраната дека детето само го сакало тоа. „Тој го сакаше тоа? Бизарна одбрана кога станува збор за личност која веројатно сè уште гледа цртани филмови пред спиење“, рече друг.
