Луис Енрике, тренерот на Пари Сен Жермен, го оцени натпреварот против Баерн како негов најдобар откако е вклучен во тренерската работа.

Првиот полуфинален натпревар се одигра на „Паркот на принцовите“, во двомеч кој беше оценет како „финале пред финалето“.

Средбата во француската престолнина секако го оправда тоа, бидејќи домаќинот славеше во трилер со девет голови (5:4).

„Докажавме зошто сме актуелни шампиони и зошто нашиот противник досега во сезоната е поразен само двапати. Можеме да бидеме горди на нашата изведба. Во текот на мојата кариера, никогаш не сум видел таков интензитет и толку високо физичко ниво. Сега не е време да се зборува за грешки, секој играч заслужува почит. Ова беше, без сомнение, најдобриот натпревар што некогаш сум го водеше како тренер“, рече Енрике.

Тренерот на ПСЖ е свесен дека натпреварот можеше да заврши и неповолно за неговиот тим.

„Заслуживме да победиме, да одиграме нерешено, па дури и да изгубиме. Беше неверојатен натпревар“, продолжи шпанскиот стручњак за да ги сумира своите впечатоци.

Ги пофали противничките играчи.

„Беа подобри на почетокот. Олисе и Дијас… Каква претстава! Го пронајдовме нашиот ритам и го свртевме мечот. Доминиравме во второто полувреме и поведовме со 5:2, но морам да ги погледнам последните минути за да разберам како дозволивме да примиме два гола“, заклучи Енрике.

Шпанскиот тренер знае колку голови му се потребни на неговиот тим во реваншот за да се пласира во финалето.

„Го прашав мојот тренерски штаб колку голови ќе ни бидат потребни да постигнеме во реваншот за да се пласираме во финалето. Се согласивме на три. Стадионот буди толку многу убави спомени; таму ја освоивме нашата прва Лига на шампиони. Баерн ќе биде таму со своите навивачи – ќе го покажеме истиот менталитет. Ќе победиме“, рече тренерот на ПСЖ по првата средба со Баварците.

Foto/ Depositphotos