Кина го забележа својот најтопол месец во модерната историја – тоа беше јули, објавија кинеските државни медиуми, додавајќи дека тоа е одраз на рекордното топло време забележано минатиот месец ширум светот. Просечните температури минатиот месец беа во просек 23,21 степени Целзиусови, што е повисока од 23,17 степени Целзиусови забележани во јули 2017 година, објави денеска кинеската национална телевизија.

Ова е највисокиот месечен просек откако земјата почна да собира сеопфатни метеоролошки податоци во 1961 година. На 22 јули светот го забележа најтоплиот ден во историјата на нашата планета, при што просечната глобална температура достигна 17,15°C.

Она што ги прави овогодинешните рекордни високи температури и топлината невообичаени е тоа што, за разлика од 2023 и 2016 година, климатскиот модел Ел Нино, кој ги зголемува глобалните температури поради потоплите води во источниот дел на Пацификот, заврши во април, но температурите не паднаа.

Некои научници веруваат дека овие податоци укажуваат на фактот дека влијанието на климатските промени врз зголемувањето на глобалните температури е поголемо од кога било досега.

Во јули е забележана повисока просечна температура во сите кинески провинции отколку во истиот месец од претходните години. Највисоки температури се забележани во провинциите Гуиџоу и Јунан, а потоа следат Хунан, Џиангкси и Жеџијанг, објави кинеската централна телевизија (CCTV).

Денеска, 1 август, температурите се уште се многу високи во делтата на реката Јангце, а метеоролозите предвидуваат дека Шангај, Нанџинг, Хангжу и другите главни градови на провинцијата ќе продолжат да имаат високи температури во следните седум дена. Во Хангжу, известува CCTV, температурите би можеле да достигнат рекордно високо ниво од над 40 степени Целзиусови.

Глобалното затоплување го направи времето во Кина поинтензивно и понепредвидливо. Втората по големина светска економија, исто така, доживеа некои од најинтензивните врнежи во поновата историја оваа година, што предизвика големи поплави и лизгање на земјиштето.

Во овогодинешната сезона на поплави во Кина се забележани 25 големи поплави на големите реки, повеќе од која било друга година од почетокот на евиденцијата во 1998 година, објави во четвртокот Министерството за водни ресурси.