Зимбабве прогласи вонредна состојба во главниот град Хараре поради епидемија на колера.

Во епидемијата досега починаа десетици луѓе, додека повеќе од 7.000 се разболеле, јавува Би-Би-Си.

Градските власти велат дека избувнувањето што се прошири низ градот ги потсетило луѓето на епидемијата од 2008 година, во која загинаа 4.000 луѓе, а најмалку 100.000 се разболеа.

„Прогласивме вонредна состојба поради колера“, изјави градоначалникот Иан Маконе, пренесоа локалните медиуми.

Надлежните бараат помош за да се спречи ширењето на епидемијата и да се обезбеди безбедна вода, наведувајќи дека помошта што ја добиваат е несоодветна.

Здравствените власти се обидуваат да лекуваат голем број пациенти, соопшти Меѓународната федерација на Црвениот крст (IFRC).

МФРЦ вели дека нема доволно здравствени работници да се грижат за пациентите или залихи за да се запре преносот на болеста.

Во последниве месеци, Зимбабве се бори со епидемија на колера поради недостаток на пристап до чиста вода.

Епицентарот на последната епидемија е густо населеното предградие Хараре – Куваџана, каде се регистрирани речиси половина од пријавените случаи, соопштија властите на Зимбабве.

Колерата е акутна инфекција на тенкото црево предизвикана од консумирање храна или вода контаминирана со бактеријата„ Vibrio cholerae“.