Најмалку 44 лица загинаа откако преполн траект се преврте на езерото Кариба во Зимбабве, соопшти полицијата.

Пловилото било регистрирано за 90 лица, но според продадените билети на него имало 114 патници и пет членови на екипажот. Еден член на екипажот, сепак, за националната телевизија изјавил дека во моментот на несреќата на траектот имало вкупно 153 лица, меѓу кои и непознат број деца.

Траектот се преврте вчера, а според сведоштвата, големи бранови предизвикале вода да навлезе во пловилото околу 30 минути по испловувањето од градот Кариба.

Во тек е операција за пребарување и спасување, во која учествуваат специјализирани нуркачки тимови, чамци и хеликоптер.

Езерото Кариба е најголемото вештачко езеро во светот според волумен и се протега околу 240 километри долж границата меѓу Зимбабве и Замбија. На него и претходно се случувале смртоносни несреќи.