Австралиската полиција соопшти дека најмалку шест лица загинале, а три се водат како исчезнати откако силните бури со грмотевици ги погодија источните сојузни држави на Австралија за време на Божиќ, оставајќи десетици илјади домаќинства во Квинсленд без струја.

Полицијата на Викторија и Квинсленд ја потврди смртта на шест лица, од кои најмладото е деветгодишно девојче за кое локалните медиуми објавија дека било однесено во поплавен одвод на атмосферска вода.

Полицијата ја продолжи потрагата по две лица исчезнати откако бродот со кој се наоѓале се преврте јужно од островот Грин во близина на Бризбејн. Тие бараат и 46-годишна жена која беше зафатена од поплавата северно од Бризбејн во Гампи.

Силни грмотевици ги погодија источните држави на 25 и 26 декември, носејќи голем град, силен ветер и силен дожд. Реките се поплавија, а силниот ветер однесе покриви и уриваше дрвја во некои од најтешко погодените области.

Метеоролошката канцеларија сè уште има предупредувања за помали поплави во источните држави и се предвидува натамошен дожд.

Државниот дистрибутер Енергекс со седиште во Квинсленд во средата соопшти дека околу 86.000 домаќинства останале без струја по невремето. Компанијата соопшти дека претрпе сериозни оштетувања на својата мрежа со повеќе од 800 исклучени далноводи и се очекува да бидат потребни денови за да се врати напојувањето на некои корисници.