Би-би-си објави репортажа од Авдијивка, град во источна Украина, кој руските сили се обидуваат да го освојат со месеци и го претворија во урнатини.

Според последните информации, падот на Авдијивка е само прашање на време.

„Раката на мажот изгледаше непрепознатливо. Како скршена и помодрена праска. Или како камен“, рече хирургот на украинската армија, чукајќи со замрзнатите прсти.

Тоа беше втор случај на смрзнатини што тој го лекува тоа утро, стоејќи покрај импровизирана операциона маса, скриена во мала куќа во близина на опколените урнатини на украинскиот град Авдијивка, на линијата на фронтот. „Веројатно ќе ги изгуби двете раце“, рече хирургот.

Како што руската инвазија се приближува кон крајот на својата втора година, расположението меѓу украинските бранители се влошува. Исцрпеноста, фрустрацијата од недостигот на оружје и сознанието дека нема да има брза воена победа – сето тоа си го зема данокот.

„Мојот најдобар пријател беше убиен утрово“, извикуваше еден војник, додека се пробиваше низ задната врата во добро скриената теренска болница на 47 бригада.

„Тешко е. Непријателот има многу од се, секаква опрема, а ние немаме речиси ништо“, рече уште еден ранет, 24-годишниот Андриј. Руска артилериска граната го погоди неговиот ров во текот на ноќта, парче шрапнел му го прободе глуждот.

Хирургот Виталиј пред војната работел во детска болница. Тој уморно зборуваше за своето искуство со ампутирање на екстремитетите минатата година за време на неуспешната украинска контраофанзива низ руските мински полиња и за навидум бескрајната рехабилитација на рани од шрапнел.

„По неколкумесечни борби, силите на Кремљ се чини дека се блиску до урнатините на Авдијивка, а некои украински војници приватно признаа дека градот, местото на некои од најжестоките борби во војната досега, може да падне во секој момент. „Вознемирени сме“, рече украинскиот офицер Олексиј од 110-та механизирана бригада на Украина, стоејќи покрај огромен подвижен топ додека звукот на руските пушки татнеше во далечината“, се вели во репортажата на Би-би-си.

Никој нема да ги брани купиштата урнатини и изгореното железо во Авдијевка, изјави вчера Дмитро Лихови, портпарол на украинските вооружени сили во регионот Таури. Според него, приоритет на воената команда е да ги зачува животите на бранителите на тој уништен град на истокот на Украина.

Руските сили со месеци се обидуваат да го освојат Авдијевка, стратешки важен град на истокот на Украина. Во последно време Русите постигнаа голем напредок и прекинаа неколку важни патишта за снабдување. Падот на Авдијивка се очекува да биде прашање на денови, а доколку и кога се случи, тоа ќе биде првиот украински град заземен од Русите во последните осум месеци.