Илјадници демонстранти се собраа вчера во Вашингтон за да протестираат против Илон Маск и администрацијата на американскиот претседател Доналд Трамп, јавува Анадолија.

Протестот се одржа на плоштадот Унион, спроти американскиот Капитол, каде учесниците извикуваа слогани против Трамп и Маск и носеа транспаренти со пораки насочени против американската администрација.

Собирот го организираше движењето „50501“ – кратенка за „50 протести во 50 држави, едно движење“ – а демонстрациите се одржаа под слоганот „Ден без крал“, алудирајќи на американскиот празник Ден на претседателите.

Демонстрантите носеа знаци како „Никој не го избра Маск“ и „Испрати го Маск на Марс“, додека некои скандираа „Стоп за пучот“.

Движењето „50501“ го одржа својот прв протест на 5 февруари, а планирани се дополнителни собири во Оклахома Сити, Тампа, Филаделфија, Питсбург, Анаполис, Орландо, Синсинати и неколку други градови.