Инфлуенсер кој се наоѓа на крузерот MV Hondius, на кој поради појава на смртоносен хантавирус починале најмалку три лица, се огласи на социјалните мрежи.
Меѓу патниците е и туристичкиот инфлуенсер Џејк Розмарин, кој на својот „Инстаграм“ објави вознемирувачко видео.
„Инаку не би снимал вакво видео“, започна тој. „Но чувствувам дека морам нешто да кажам, па си запишав неколку мисли.“
View this post on Instagram
Во солзи откри дека ситуацијата на бродот е „повеќе од реална“ за сите нив.
„Ние не сме само приказна. Не сме само наслови во весниците. Ние сме луѓе кои имаат семејства, свои животи и луѓе што нè чекаат дома“, рече тој.
Тој се осврна и на најтешкиот дел од целата ситуација. „Има многу неизвесност и тоа е најтешко. Сè што сакаме сега е да се чувствуваме безбедно, да имаме јасни информации и да се вратиме дома.“
Ги замоли сите што ги следат вестите за бродот да се потсетат дека „зад ова стојат вистински луѓе“ и дека ова „не се случува некаде далеку“. „Ќе споделам повеќе информации кога ќе можам, а дотогаш ве молам за љубезност и разбирање“, заклучи тој.
Во описот на видеото Розмарин ги пофали напорите на екипажот и компанијата.
View this post on Instagram
„Исто така сакам да нагласам дека компанијата Oceanwide Expeditions и целиот екипаж на бродот се справуваат со оваа ситуација најдобро што можат и многу сум им благодарен за трудот што го вложуваат во секое време“, напиша тој.
По неговата објава, во коментарите следбениците му упатија бројни пораки за поддршка.
„Се молам за тебе, Џејк, и за сите на бродот!“, „Биди силен, сè ќе помине“ и „Испраќаме молитви за безбедно враќање дома без вирус“, се дел од пораките.
Светската здравствена организација (СЗО) во неделата потврди дека на бродот во Атлантскиот океан се регистрирани вкупно седум случаи на зараза, од кои три завршиле со смрт. На патниците, поради вонредните околности, сè уште не им е дозволено да го напуштат бродот.
Според СЗО, „хантавирусите се група вируси што ги пренесуваат глодари и кои кај луѓето можат да предизвикаат тешки заболувања“. Болеста најчесто се шири преку контакт со глодари, а во најтешките случаи може да доведе и до смрт.
Бродот MV Hondius испловил на 1 април на експедициско патување од Аргентина кон Зеленортските Острови. Нешто повеќе од три недели по почетокот на патувањето починала една патничка од Холандија. Исто така е потврдено дека се подготвува медицинска евакуација на британски член од екипажот за да му се обезбеди итна медицинска грижа.
