Претседателката на Европската комисија Урсула фон дер Лајен изјави дека местото на Западен Балкан, Украина и Молдавија е во Европската Унија.

„Не можеме да си дозволиме да ги оставиме Европејците зад себе. Јасно е дека стратешкиот интерес на ЕУ е нашата унија да биде целосна“, рече таа во својот годишен говор за „Состојбата на Унијата“.

Оцени дека проширувањето е најдобрата инвестиција за мирот, безбедноста и просперитетот на ЕУ.

Таа потврди дека се залага за Унија која ќе брои повеќе од 30 членки и дека проширувањето ќе биде „катализатор на напредокот“.

„Докажавме дека можеме да бидеме геополитичка унија и покажавме дека можеме брзо да напредуваме кога сме обединети. Верувам дека нашиот тим може да функционира и со 30 плус“, рече Фон дер Лејен.

Сепак, таа предупреди дека процесот на членство во Европската унија, која има 27 членки, се заснова на заслуги и дека Европската комисија секогаш ќе го брани овој принцип.

Кој е вклучен во ЕУ 30 плус?

Западен Балкан е регион од шест земји кои имаат загарантирана европска перспектива.

Украина и Молдавија добија кандидатски статус минатата година и се сметаат за идни членки на ЕУ.

Фон дер Лајен ја охрабри Грузија, која се уште нема кандидатски статус, да биде дел од европското семејство.

Сепак, ја прескокна Турција, која ги започна пристапните преговори во 2005 година, кои во моментов се замрзнати, пишува „Радио Слободна Европа“.

Последен говор за првиот човек на Европската комисија

Ова беше последен говор за состојбата во ЕУ, но и индиректен почеток на нејзината предизборна кампања.

Во јуни идната година ќе се одржат европски избори кои ќе резултираат со нова структура во сите европски институции.

По овие избори со директни гласови на граѓаните се избираат само пратеници во Европскиот парламент.

Шефовите на држави и влади на земјите-членки на ЕУ ги избираат шефовите на Европската комисија, Европскиот совет и Европската служба за надворешни работи.

Претседателот на ова главно извршно тело на ЕУ го избираат лидерите на сите земји-членки.

Каква е состојбата на Унијата?

Обраќањето за состојбата на Унијата, односно состојбата на Европската унија, е најважниот годишен момент за ЕУ.

Тоа е годишниот обемен говор на претседателот на Европската комисија на пленарната сесија на Европскиот парламент и редовно се одржува во септември.

Говорот вклучува активности кои Европската комисија има намера да ги преземе преку законски и други иницијативи до крајот на следната година.

Проширување низ повеќе реченици, но без датуми

Проширувањето е непопуларна тема меѓу земјите-членки на ЕУ во последниве години. Шефицата на Европската комисија имаше неколку двосмислени пораки на оваа тема во претходните годишни говори.

По руската агресија врз Украина, оваа тема доби на тежина и го промени расположението во ЕУ и станува поверодостојно ветување за сите земји кои имаат за цел членство во европското семејство.

Така Урсула фон дер Лајен и посвети повеќе простор и реченици на оваа тема, на самиот крај од својот говор кој траеше повеќе од 60 минути. Таа, сепак, избегна да ги спомене временските рокови кога ЕУ би можела дополнително да се прошири.

Шарл Мишел, нејзиниот колега од Европскиот совет, на крајот на август излезе со поамбициозен план и рече дека ЕУ треба да биде подготвена за нови членки до 2030 година.