Седум лица се уапсени во Шефилд под сомнение за убиство на новородено девојче. Полицијата одговори на адреса во Винкобанк кратко пред 6 часот вчера наутро по пријавите за дете кое е во опасност. Новороденчето е пронајдено во стан во Холивел Хајтс.

И покрај интервенцијата на полицијата и болничарите, девојчето е прогласено за мртво на местото на настанот, соопшти полицијата на Јужен Јоркшир. Главниот инспектор Ема Најт изјави дека е свесна дека инцидентот ќе предизвика јавна загриженост, објави Скај њуз.

„Сакам да ја уверам локалната заедница. Нашиот тим детективи и полицајци работи напорно на овој случај и е целосно фокусиран на обезбедување правда за девојчето“, рече таа.

Уапсени се седум лица
Таа додаде дека седум лица се уапсени под сомнение за убиство. „Сите се во полициски притвор и се обидуваме да ја утврдиме точната возраст на некои од нив“, објасни таа.

Конечно, таа ја замоли јавноста за трпение: „Истрагата е само на почеток, па затоа ги замолуваме граѓаните да не шпекулираат за тоа што се случило“, рече таа.