Турскиот министер за транспорт Абдулкадир Уралоглу потврди дека брод во турска сопственост поминал низ Ормускиот теснец откако добил дозвола од Иран, објави Ал Џезира.

Тоа беше еден од 15-те бродови во сопственост на турски компании кои чекаа во близина на иранскиот брег, а за чиј статус Анкара е во контакт со Техеран, објави Хабертурк.

„Таму имаше 15 бродови во турска сопственост. Добивме дозвола од иранските власти за еден од нив, оној што користеше иранско пристаниште, и тој помина“, изјави Уралоглу за турскиот медиум.

Преминувањето на бродот доаѓа во време на зголемени тензии, откако Иранската револуционерна гарда се закани дека ќе нападне секој брод што ќе помине низ стратешкиот Ормуски теснец. Заканата беше упатена како одмазда за нападите меѓу САД и Израел и може да доведе до затворање на теснецот за клучни испораки на нафта.