Лидерот на Чеченската Република Рамзан Кадиров ги коментираше нередите на аеродромот во Дагестан, во кои агресивна група луѓе извикуваа антисемитски пароли, со намера да „нападнат израелски граѓани“.

Кадиров ги повика силите на Министерството за внатрешни работи и Националната гарда да пукаат „во чело“ на бунтовниците доколку не одговорат на три предупредувачки истрели, пренесува РИА Новости.

– Ако имаме макар и едно лице кое учествува во неовластени нарушувања, приведете го и ставете го во затвор. Или испукајте три предупредувачки истрели во воздух, а потоа, ако лицето не го почитува законот, испукајте четврти истрел во челото. Тој повеќе нема да учествува во немирите. Ова е моја наредба – рече лидерот на Чеченија на состанокот во владата на републиката со претставници на Министерството за внатрешни работи и Националната гарда.

На 29 октомври неовластени лица упаднаа на пистата на аеродромот во Махачкала. Се наведува дека тие трагаат по израелски државјани кои пристигнале со лет од Тел Авив.

Според Министерството за здравство на Дагестан, повеќе од 20 луѓе – и безбедносни сили и цивили – биле повредени за време на немирите на аеродромот.