Министерот за надворешни работи на Русија, Сергеј Лавров денеска телефонски разговараше со неговиот турски колега Хакан Фидан за ситуацијата во Украина и за Договорот за извоз на жито преку Црното Море.

Москва се заканува дека ќе се повлече од Договорот, кој гарантира безбеден извоз на жито и ѓубрива од украинските пристаништа на Црното Море, бидејќи не се исполнети неколку нејзини барања за рускиот извоз на жито и ѓубрива. Договорот истекува на 17 јули.

Турскиот претседател Реџеп Тајип Ердоган вчера изјави дека ја притиска Русија да го продолжи Договорот, постигнат со помош на Анкара и Обединетите нации минатата година, за уште најмалку три месеци.

Руското Министерство за надворешни работи прецизираше дека Фидан и Лавров разговарале за глобалната безбедност на храната, како и за некои аспекти на руско-турската билатерална соработка, вклучително и распоред за претстојните контакти.

Тема на разговор беше враќањето од Турција во Украина на командантите на украинскиот баталјон Азов. Баталјонот е прогласен за терористичка организација од Москва.

Страните разменија мислења за регионалната агенда со акцент на последните настани околу Украина, вклучително и ситуацијата со враќањето на командантите на Азов од Истанбул во Киев, соопшти руското МНР.

Во соопштението се истакнува и дека Лавров и Фидан разговарале и за испорака на воена опрема на Киев.