Британскиот премиер Кир Стармер „нема намера да разговара“ со Владимир Путин, изјави тој, два дена по разговорот меѓу германскиот канцелар Олаф Шолц и рускиот претседател.

„Канцеларот Шолц сам одлучува со кого ќе разговара. Немам намера да разговарам со Путин“, рече Стармер, кој се подготвува за самитот на Г-20 што денеска започнува во Бразил.

„Мораме да ги удвоиме нашите напори за да ја зајакнеме поддршката за Украина“, додаде лабуристичкиот премиер. Оваа тема е „на врвот“ на неговата агенда на самитот на Г20, на кој присуствуваат големите светски лидери, но не и Владимир Путин.

Во вторник го славиме илјадитиот ден од војната во Украина, потсети британскиот премиер.

„Тоа значи 1.000 дена руска агресија, 1.000 дена жртва за украинскиот народ, а неодамна гледаме дека севернокорејските трупи соработуваат со Русите“, продолжи тој.

„Тоа го покажува очајот на Русија, но има и сериозни импликации за европската безбедност и безбедноста на Индо-пацификот“, предупредува Стармер.

„Мораме да обезбедиме целосна поддршка на Киев, колку што е потребно“, додаде лидерот на лабуристите.

Доналд Трамп, кој треба да се врати во Белата куќа во јануари, вети дека ќе стави крај на конфликтот меѓу Киев и Москва во рок од 24 часа.

Со телефонски разговор со Владимир Путин, Олаф Шолц го навлече гневот на Киев. Украинскиот претседател Володимир Зеленски го обвини дека ја отворил „Пандорината кутија“.

Одлуката на Шолц доби критики и од некои сојузници на НАТО, како што е Полска, а Финска побара воздржаност од европските лидери во контактите со Москва во врска со војната во Украина.