Украинскиот претседател, Володимир Зеленски, за првпат призна дека украинските сили се борат во руската област Курск и рече дека операцијата е дел од напорите на Киев да го притисне агресорот.

Украинските сили во вторникот извршија инвазија на руска територија, а Зеленски досега молчeше за таа операција.

Во саботата вечерта, тој призна дека разговарал со командантот на украинската армија, Олександр Сирски.

„Денеска добив неколку извештаи од командантот Сирски во врска со линиите на фронтот и нашите акции на територијата на агресорите“, рече тој.

„Благодарен сум на секоја единица на нашите одбранбени сили. Украина докажува дека може да го обезбеди потребниот притисок врз агресорот“.

Тој ја пофали способноста на војската да изненади и им се заблагодари што заробиле руски војници кои ќе бидат искористени во идните преговори.

Украинските сили ја пробија границата во вторникот, изненадувајќи ја руската војска по неколкумесечниот постепен напредок на руските сили во источна Украина.

Украинските војници навлегоа до 20 километри во областа Курск, што е најголемиот украински напад на руска територија од почетокот на руската инвазија на Украина во февруари 2022 година.

Повеќе од илјада украински војници ја нападнале Русија со поддршка на десет тенкови и дваесет други оклопни возила, соопшти главниот штаб на руската армија.

Се водат тешки борби, а руските политичари и војската велат дека тоа е украинска „инвазија“.

Рано во саботата, руските новински агенции објавија дека Националниот антитерористички комитет вовел антитерористички мерки во областа Курск и во блиските региони Брјанск и Белгород. Новинската агенција РИА објави дека мерките вклучуваат евентуално раселување на жителите, ограничувања во сообраќајот, зголемена безбедност околу чувствителните места и прислушување на комуникациите.