Висок севернокорејски воен претставник ги критикуваше САД за испраќањето на воена помош за Украина, објави државната новинска агенција „КЦНА“.

Парк Јонг Чон, еден од највисоките воени претставници на Северна Кореја, рече дека Русија има „право да одлучи за секаков вид одмазднички напад“, додавајќи дека Вашингтон „продолжува да ја турка Украина во војна против Русија, што може да предизвика посилен одговор од Москва и нова светска војна“.

САД и Јужна Кореја се вознемирени од продлабочувањето на воената соработка меѓу Русија и Северна Кореја и ги обвинија за кршење на меѓународните закони за трговија со оружје.

Се верува дека Русија од август до јануари примила околу 1,6 милиони артилериски гранати од Северна Кореја, објави Вашингтон пост.

Владимир Путин и Ким Џонг Ун потпишаа пакт за време на посетата на Путин на Пјонгјанг минатата недела. Тие ветија дека секоја страна ќе обезбеди „итна воена помош на другата во случај на вооружена агресија“.