Шпанскиот премиер Педро Санчез ги обвини дел од европските влади дека во кризата со мигрантите во Сеута реагираат водени од „предрасуди, лажни вести, незнаење или политички интереси“.
Во писмо упатено до раководството на европските институции, Санчез ја оцени реакцијата на дел од партнерите на мигрантската ситуација во шпанската автономна енклава како „себична, поларизирачка и незаконска“ и побара итен состанок на министрите за внатрешни работи на ЕУ.
Барањето следува откако Италија ја суспендираше шенгенската соработка со Шпанија, а Финска и Данска ја спомнаа можноста за привремено исклучување на Мадрид од зоната на слободно движење.
Шпанската влада проценува дека од околу 50.000 лица кои влегле во Сеута од Мароко, повеќе од 48.000 веќе се вратиле назад.
Состанок на министрите побараа и Италија и Данска, кои предводат група од 22 земји членки на ЕУ со построг став кон миграцијата. Во групата се приклучи и Германија, додека Франција, Португалија, Ирска, Луксембург и Шпанија не се дел од иницијативата.
Во писмото на овие земји индиректно се критикува миграциската политика на Санчез, особено поради легализацијата на голем број мигранти без регулиран статус.
„Мораме да ги зајакнеме надворешните граници и да ги преиспитаме сите политики кои можат да дејствуваат како фактор на привлекување, како што е легализацијата на голем број мигранти во нерегуларен статус“, се наведува во документот.
Санчез, пак, во писмото до претседателката на Европската комисија Урсула фон дер Лајен, претседателот на Европскиот совет Антонио Коста и ирскиот премиер Михаел Мартин, изрази загриженост поради, како што наведе, нерамномерната реакција на европските партнери.
„Мнозинството ни даде поддршка и солидарност и понуди помош. Други, пак, одлучија да ја нападнат Шпанија и да бараат нејзино привремено исклучување од Шенген зоната“, напиша Санчез.
Шпанската влада смета дека таквиот став е спротивен на европското и хуманитарното право, како и на принципите на солидарност на кои се темели ЕУ. Санчез посочи дека Сеута не е дел од шенгенскиот простор, поради што, според него, заканите за суспензија немаат правна основа.
Тој се повика и на податоци од европската агенција за гранична и крајбрежна стража Фронтекс, според кои Шпанија во периодот од 2021 до 2026 година имала двојно помалку нелегални влегувања од Италија, иако е единствената земја членка со копнена граница со Африка.
Санчез наведе дека Шпанија ја вратила контролата врз границата за помалку од 48 часа, ги вратила речиси сите мигранти и спречила нивно движење кон други земји од ЕУ, со, како што рече, мала поддршка од европските партнери.
Во меѓувреме, претседателката на Европската комисија изјави дека огромното мнозинство од мигрантите кои нелегално влегле во Сеута се вратиле во Мароко благодарение на работата на шпанските и мароканските безбедносни сили.
„Ниту едно лице не стигна до континенталниот дел на Шпанија ниту до остатокот од ЕУ. Ова покажува зошто контролата на европските граници е важна. Имаме силен систем, но мораме дополнително да го зајакнеме“, порача Фон дер Лајен.
