Соединетите Американски Држави се загрижени за односите на Унгарија со Русија и ја сметаат одлуката на премиерот Виктор Орбан да се сретне со рускиот претседател Владимир Путин за „загрижувачка“, соопшти денеска американската амбасада во Будимпешта.

Во вторникот, Орбан одржа билатерална средба со Путин на маргините на форумот „Појас и пат“ во Пекинг. Тој е единствениот лидер на Европската унија кој присуствуваше на форумот или се сретна со Путин откако Русија ја нападна Украина на 24 февруари 2022 година.

„САД се загрижени за односите на Унгарија со Русија“, се вели во соопштението на американскиот амбасадор во Унгарија Дејвид Пресман. Претходно оваа недела, Пресман во објава на Х рече: „Лидерот на Унгарија избира да застане покрај човекот чии сили се одговорни за злосторствата против човештвото во Украина, а тој самиот е меѓу нашите сојузници“.

По средбата на Орбан, амбасадорите на земјите од НАТО и на Шведска се собраа во Будимпешта за да разговараат за загриженоста за растечкиот пристап на Унгарија кон Москва, јавува Радио Слободна Европа.

Главниот политички помошник на Орбан, Балаш Орбан, ги отфрли критиките на САД во објава на Х претходно оваа недела, велејќи дека Унгарија е „сита од лицемерието“ на американскиот амбасадор. Односите меѓу Будимпешта и Вашингтон беа затегнати минатата година поради доцнењето на Унгарија со ратификувањето на приемот на Шведска во НАТО.